நைமிசாரண்யம் - புனித யாத்திரையில் அனுபவம்

நைமிசாரண்யம் - புனித யாத்திரையில் அனுபவம்
By V.Savithri, Chennai

நைமிசாரண்யம் உத்தராஞ்சல் மாநிலம் சீத்தாபூர் மாவட்டத்தில் லக்னோவில் இருந்து 89 கி மீ
தொலைவில் கோமதி ஆற்றக் கரையில் அமைந்துள்ள அழகிய ஸ்தலம். லக்னோவில் இருந்தே நேரடி பஸ்வசதி இருக்கிறது. இதை நைமிசார் நிம்கார் என்றும் அழைக்கிறார்கள்.
ஒரு முறை முனிவர்கள் பிரம்மாவை அணுகி அமைதியாக பன்னிரெண்டு ஆண்டுகள் தவமிருந்து மாபெரும் வேள்வி செய்ய ஏற்றதொரு இடத்தைத் தங்களுக்கு காண்பித்தருள வேண்டும் என வேண்டினர். அப்போது பிரம்மா ஒரு தர்ப்பைப் புல்லை எடுத்து சக்கர வடிவில் வளைத்து அதனை உருட்டி விட்டு “இந்தச்சக்கரம் எங்கு போய்நிற்கிறதோ அதுவே நீங்கள் விரும்பிய இடம்” என்றாராம்.அந்தச் சக்கரம் நின்ற இடம் தான் இந்த நைமிசாரண்யம். நேமி என்றால் சக்கரம் ஆரண்யம் என்றால் காடு என்பர். நைமிசாரண்யத்தில் வேள்வியை நிறைவு செய்த முனிவர்கள் வேள்வியின் பலனை மகவிஷ்ணுவுக்கு தர எண்ணினார்கள். அதன்படியே வேள்விக் குண்டத்தில் எழுந்தருளிய விஷ்ணுவும் அவிர்பாகம் பெற்றார் என்கிறது ஸ்தலபுராணம். திரேதாயுகத்தில் அஹி ராவணன் மஹிராவணன் இன்ற அசுரர்கள் ராம லட்சுமணர்களைப் பாதாள லோகத்துக்கு கொண்டு சென்றுவிட்டனராம். அனுமன் அசுரர்களைக் கொன்று ராம லட்சுமணர்களைத் தோளில்சுமந்து வந்தாராம். அப்போது அவர் வந்த இடமான நைமிசாரண்யம் என்று உள்ளூர் மக்கள் சொல்கிறார்கள். இந்தத் திருதலத்தில் ஸ்ரீமகாவிஷ்ணு ஆரண்ய ஸ்வரூபியாக இருப்பதாக ஐதீகம். அதாவது வனம் வடிவில் அருள்கிறார். இறைவனை இயற்கையோடு இயைந்த வனவடிவில் வணங்கும் முறை 108 வைணவ திவ்ய தேசங்களில் இங்கு மட்டும்தான். அதுபோல ஸ்ரீ விநாயகருக்கு தனிச் சந்நிதி இருப்பதும் இங்கு சிறப்பு
நாங்கள் 12 பேர் இந்த நைமிசாரண்யம் என்னும் மஹாபுண்ணிய க்ஷேத்திரத்தைத் தரிசிக்கும் வாய்ப்புக் கிடைக்கப்பெற்றோம். சென்ற பிப்ரவரி 2016 இல் புதுடில்லி இலிருந்து கிளம்பினோம். ரயில் மார்க்கமாக லக்னோ சென்று இரவு அங்கு தங்கி காலை 7 மணிக்கு வான் மூலம் நைமிசாரண்யம் அடைந்தோம். அங்கு எங்களுக்கு தங்க கணபதி தாம் என்ற இடம் முன்பே பதிவு செய்து இருந்தோம். அங்கு எங்கள் உடைமைகளை வைத்துவிட்டு முதலில் சக்ர தீர்த்தம் என்றோம். தீர்த்த ப்ரோஷணம் செய்து கொண்டு அங்குள்ள மற்ற தெய்வங்களை தரிசித்தோம். அங்கு நாங்கள் போனபோது ஒரு பிரேத ஊர்வலம் வந்து அதற்கு அந்த சக்ர தீர்த்தத்தை தெளித்துகொண்டு பின்பு தூக்கி செல்வதை பார்த்தோம். அது நல்ல சகுனமல்லவா! பின்பு அருகிலேயே உள்ள அஹோபில மடம் பாலாஜி யை தரிசித்து அங்கு மடத்திலேயே தமிழ் நாட்டு மதிய உணவு உண்டோம். மதியம் ஸ்ரீ லலிதா தேவி மந்திர் என்ற ஒரு சக்தி பீடம் அருகில் உள்ளது. அங்கு சென்று தரிசித்தோம். அம்பாளின் இதயம் விழுந்த சக்தி பீடம் இது. மாலை வியாச கட்டி என்ற வியாசர் தங்கி புராணம் எழுதிய இடம் சென்றோம். அது சுமார் ஆறு கிலோமீட்டர் துரம் உள்ளது. வேனில் சென்றோம். வியாச ரின் உருவம் இங்கு உள்ளது, ஒரு பெரிய ஆலமரம் 5095 ஆண்டுகள் பழமையானது. 88ஆயிரம் முனிவர்கள் இங்கு தவம் செய்தார்கள் என்று சொல்கிறார்கள். அங்கு அந்த இடத்தில உள்ள அர்ச்சகர் பண்டா முனிவர் வியாசர் பற்றியும், அந்த இடத்தின் மகிமை பற்றியும் ஹிந்தியில் சொன்னார். அதை சுந்தரம் தமிழில் எங்களுக்கு விளக்கினார்.
அந்த இடத்திலேயே ராதா கிருஷ்ணன் கோயில் ஒன்று விசாலமான இடத்துடன் இருந்தது. அங்கு எங்கள் குருஜி அமர்ந்து ஸத்சங்கம் நடதினோம். குருஜி அவர்கள் சுமார் ஒன்றரை மணி நேரம் குருமண்டலம் தோன்றியது, தவம், தியானம் என்று மிக உபயோகமான விஷயங்கள் பற்றி சொன்னார்கள். நாங்களும் எங்களில் சிலர் எங்கள் அனுபவங்களை பகிர்ந்து கொண்டோம். இரவு ஆகிவிட்டதால் தங்குமிடம் வந்து இரவு உணவு உண்டபின் ஒய்வு கொண்டோம்.
மறுநாள் காலை சக்ர தீர்த்தத்தில் ஸ்நானம் முன்பே சொன்னபடி அந்த தீர்த்தம் உள்ளே சுழன்று கொண்டு இருக்கிறது. ஸ்நானம் செய்யும்போது எங்களை அடியில் சுற்றி இழுத்துக்கொண்டு செல்வதை உணர்ந்தோம். சிலர் மூன்று முறை கூட சுற்றினோம். அப்படியே அனைவரும் சித்து தூரத்தில் உள்ள கோமதி நதி சென்றோம். அங்கு ஓடும் ஜலம் மிக அழகு. ஸ்நானம் அற்புதம்.
மதியம் பார்க்கவேண்டிய பல இடங்களில் ஒன்று 'ருத்ராவர்த்' என்னும் இடம். இதுவும் கோமதி நதிக்கரை. இது ஊருக்கு வெளியே பன்னிரண்டு கிலோமீட்டர் தொலைவில் அமைந்துள்ளது. ஒரு கெய்டு எங்களை அழைத்து சென்றார். சிவபெருமான் அருள் நிறைந்துள்ள இந்த இடம், மிக எளிமையாக, அமைதியாக இருக்கிறது. இந்த இடத்தைச் சென்றடைந்தோம். அதன் அருகில் இருந்த ஒரு கடையில், ஒரு தட்டில், வில்வம், பூ,வாழைப்பழம், ஆரஞ்சு பழம் ஊதுபத்தி முதலானவை விற்கிறார்கள். அவைகளை வாங்கிக் கொண்டோம்.
அங்கே, ஒரு சிறு கோவிலில், சிவபெருமான் சன்னதி இருக்கிறது. தரையில் இருக்கும் ஆவுடையார், அதன் மேல் சிறு லிங்க வடிவம் அமைந்த சன்னதி அது. அங்கே ஒரு சாது இருந்தார். எங்களைக் கண்டதும், அருகே இருந்த ஒரு சிறு குளத்திற்கு அழைத்துச் சென்றார். அங்கு கோமதியின் தண்ணீர் சற்றுக் கலங்கலாக உள்ள ஒரு சிறு குளம் அது. படிகளில் இறங்கிச் சென்றோம். எங்கள் கைகளில் இருந்ததட்டுக்களிலிருந்த வில்வ தளங்களை மொத்தமாக வாங்கி, எங்களிடம் காண்பித்து, சிவனை வேண்டி குளத்தில் போட்டோம். என்ன ஆச்சரியம்!!!, வில்வ இலைகள், குளத்தின் மேலே மிதக்காது, உள்ளே சென்று விட்டன. அடுத்த ஆச்சரியம் சில கணங்களில் நிகழ்ந்தது. எங்கள் கைகளில் இருந்த வாழைப்பழங்களை வாங்கி, ஒவ்வொருவராகக் குளத்தின் உள்ளே போடச் சொன்னார். நாங்களும் செய்தோம். முழு வாழைப்பழம், குளத்தின் உள்ளே போட்டதும், சற்று மூழ்கி, உடனே சட்டென்று, திரும்பி மேலே எழும்பி செங்குத்தாக மிதந்து வந்தது. துளிஅழுக்கு இல்லாமல், பளிங்கு போல்!!!. ஆச்சரியத்தில் எங்களுக்கு வாய் மூடவில்லை. சிவப்பிரசாதம் என்று பக்தியுடன் அந்த சாது அவற்றை எடுத்து வழங்கினார். நாங்களும் சாப்பிட்டோம். பிறகே சிவன் சன்னதிக்கு அழைத்துச் சென்றார். ஒரு செம்பில் குளத்து நீரை எடுத்து வந்து அபிஷேகம் செய்து, கையோடு கொண்டு வந்திருந்த வில்வதளங்கள் மற்றும் பூக்களால் அர்ச்சித்து, ஊதுபத்தி காண்பித்து வழிபட்டோம் (அங்கு நாமே செய்யலாம்). அருகில், நாகர், பகளாமுகிதேவி ஆகியோரின் சன்னதிகளும் தனிக்கோவிலாக அமைந்துள்ளன. அவற்றையும் தரிசித்தோம். பக்கலில் ஒரு பிணம் எரிந்து கொண்டு இருந்தது. பிறகு அந்த சாது கூறினார். சிவனருள் இருப்பவர்களுக்கு மட்டுமே, பழம் இவ்வாறு மேலேழும்பி வருமாம். நாங்கள் இறையருளை எண்ணி மெய்சிலிர்த்தோம். தட்டுக்களை திரும்பக் கொண்டு கொடுக்கும் போது, கடைக்காரரும், 'பழம் மிதந்ததா?' என்று கேட்டார். சிலருக்கு அவ்வாறு மிதக்காதாம். 'இறையருள் இருந்தால்தான் இந்த இடம் வரவே முடியும். இதைப் பற்றித் தெரிந்தவர்கள் மிகக் குறைவு. அப்படியும் சிலருக்கு பழம் உள்ளே போய்விடும்' என்றார். சிவனருளை எண்ணி, மகிழ்தோம். வணங்கியபடி ஊர் திரும்பினோம். நைமிசாரண்யம் செல்லும் வாய்ப்பு கிடைக்கப் பெறுபவர்கள், தவறாது இந்த இடத்தைத் தரிசிக்க வேண்டும். அங்குள்ள சிவன் கோயில் பற்றிய விவரம் அறிந்து மகிழ்ச்சியடைகிறேன். சிவபெருமானின் அருட்பிரசாதம் தங்களுக்குக் கிடைத்தது பூர்வபுண்ணியமேயாகும். சிவனருள் நம் அனைவருக்கும் சித்திப்பதாகுக.
மாலை எங்கள் குருநாதர் நடத்திய சத்சங்கத்தில் ந்யாசம், ரஸ்மிமாலை மற்றும் உபாசனை பற்றி நிறைய தெரிந்து கொண்டோம். இரவே லக்னோ போகவேண்டியதால் இரவு உணவை முடித்துக்கொண்டு வேனில் புறப்பட்டு 9 மணிக்கு லக்னோ வந்தோம். சிறிது ஓய்வுக்கு பின் ரயில் நிலையம் வந்து 11 மணிக்கு ரயில் ஏறி மறுநாள் காலை டில்லி ஆனந்தவிகார் ஸ்டேஷன் வந்தோம் அனைவரும் ஆட்டோவில் சரோஜினிநகர் குருஜியின் இருப்பிடம் அடைத்தோம். அங்கு அனைவரும் குளித்து உணவு உண்டோம். உணவு ஏற்பாடு மிக அழகாக மைதிலி செய்து வைத்து எங்களை உபசரித்தது வெகு அழகு, சென்னை செல்பவர்களுக்கு உணவும் பார்ஸல் கொடுத்தாள். 1 மணிக்கு விமானம் ஏறி அனைவரும் சுகமே இருப்பிடம் அடைத்தோம்.
இந்த பயணம் நன்றாக சிறப்பாக அமைய குருவருள் முக்கியமாக இருந்தது. அவர்கள் மிக்க சிரமப்பட்டு இத்தனை ஏற்பாடுகளும் செய்தார்கள். அவர்களுக்கு நன்றி என்பது அவைகள் சொல்லை கேழ்ப்பதும் நடப்பதும் தான். அவர்களுக்கு நமஸ்காரங்கள். விமான டிக்கெட் ரயில் டிக்கெட் ஆகியவைகளை தக்கபடி முன்பதிவு செய்து உதவிய திரு சதீஷ்க்கு எங்கள் நன்றி. நைமிசாரண்யத்தில் தங்க லாட்ஜ் ஏற்பாடுகளை செய்த பெங்களூர் திரு.குமாருக்கு நன்றி. ரயில் நிலையம் போகவும் திரும்ப விமான நிலையம் போகவும் டாக்ஸி ஏற்பாடுகளை செய்த திரு நாகசுந்தரத்துக்கும் நன்றி. போகும்போதும் திரும்பும் போதும் நல்லசாப்பாடு வசதிகள் செய்த மைதிலி, சாந்தா, சாந்தாவின் சகோதரர் குடும்பத்தார்கள் அனைவருக்கும் மிக்க நன்றி.

ஒவ்வொருவருக்கும் ஒரு விதமான அனுபவங்கள். பகிர்வுக்கு நன்றி.