ஸ்ரீஅம்பாள் வழிபாடு - தொடர் கட்டுரை-1

ஸ்ரீஅம்பாள் வழிபாடு - தொடர் கட்டுரை-1

அம்பாள் வழிபாடே சாக்தம் என்பர். ஒவ்வொரு பெண் வடிவமும் உயிருள்ள பெண் தெய்வம். இந்தியாவில் மட்டும் தான் உயிருள்ள ஒரு பெண்ணை சக்தியின் வடிவ கன்னி தெய்வமாகவும்,ஸ்வாஸினி வடிவ தெய்வமாகவும் வணங்கி வழிபடுகின்றனர்.
ஆதிசங்கரருக்கு முன்னால் காளி வழிபாடு வெகுவாக நரர்களை, மிருகங்களை பலியிடுதல் என இருந்துவந்தது. காளி மிகவும் உக்ரமானவள் என நம்பப்பட்டது. ஆதி சங்கரர் தேவியினை அன்புள்ளவளாக விளக்கி ஸ்ரீசக்கரத்தில் பிரதிஷ்டை செய்து வழிபடும் முறையினை வகுத்துக் கொடுத்தார். இந்த முறைதான் பெரும்பாலும் நடைமுறையில் உள்ளது. காஞ்சியில் இம்முறையில் ஸ்ரீ காமாக்ஷி சந்நிதியில் ஸ்ரீசக்ரம் பிரதிஷ்டை செய்துள்ளார். தாய் உலகம் அனைத்திற்கும் அன்னை என்பதில் மாற்று கருத்துக்கு சிறிதேனும் இடமில்லை. தேவி பாகவதம் தேவிதான் முழுமையான பராசக்தி என்கிறது. தேவி பிரம்மா, விஷ்ணு, சிவன் ஆகிய மூவரையும் படைத்தார். தன்னுடைய ஸத்வ, ரஜஸ், தமஸ் அம்சங்களை பிரதிபலிக்கும் வகையில் சரஸ்வதி, லஷ்மி, பார்வதி ஆகிய மூவரையும் படைத்தார். இந்த மூவரையும் மூன்று கடவுளர்கட்கும் அவரவர் படைப்பு முதலான தொழிலினை செம்மையாய் செய்ய அனுசரணையாக இருப்பதற்கென திருமணம் செய்து வைத்தார். படைப்புத் தொழில் செய்பவரான பிரம்மாவிற்கு சரஸ்வதியையும் காக்கும் கடவுளான விஷ்ணுவிற்கு லக்ஷ்மியையும் அழிக்கும் கடவுளாகிய சிவனுக்கு பார்வதியையும் மணம் முடித்து வைத்தார். சிவன் பார்வதியுடன் சேர்ந்து இல்லை எனில் தன்னுடைய தொழிலை சரிவர செய்யமுடியாது என்றும் அவள் இல்லையெனில் சவத்தினை ஒத்தவர் எனவும் ஸௌந்தர்யலஹரி கூறுகிறது. சக்தி மூன்று கடவுளர்கட்கும். தேவையானது இது அவர்கள் மூவருக்கும் பொருந்தும். இது எல்லா உயிரினங்களுக்கும் பொருந்தும். ஒரு மனிதனின் வெற்றிக்குப் பின்னால் ஒரு பெண் இருக்கிறார் என நாம் உலக வழக்கில் சொல்லுகிரோமே
தேவிக்கு என எல்லாகோயில்களிலும் தனி சன்னதி உள்ளது. ஒவ்வொரு சிவன் கோயிலிலும் சக்தியினை அவரின் பலவித புகழ் வடிவிலே ஏதாவது ஒரு வடிவில் காண்கிறோம். தற்காலத்தில் தாயின் வழிபாட்டிற்கு சிறந்த முக்கியத்துவம் இருக்கிறது. இன்றைய உலக கஷ்டமான நிலையில் தேவியின் வழிபாடுதான் சுகத்தையும் அமைதியையும் கொடுக்க வல்லது.
நாளையும் தொடரும்..........

ஸ்ரீதேவியின் மகிமைகள் - ஸ்ரீ தேவிபாகவதம்

ஜனமேஜய மன்னன் அரண்மனை வாசலை நோக்கி வேகமாக நடந்து “வருக, வருக வியாசமஹா முனிவரே வருக. தங்கள் வருகையினால் எங்கள் அரண்மனை புனிதமுற்றது” என்று கூறி வியாசரை வரவேற்றான். விருந்துணவிற்குப் பிறகு வியாசர் தேவியின் பல்வேறு லீலைகளைப் பற்றிக் கூறத்தொடங்கினார். “மகா முனிவரே, ஒரு சந்தேகம், கேட்கலாமா?” என்றான் ஜனமேஜயன். வியாசர் தலையசைக்க “வியாச முனிவரே! இந்திரன் மற்றும் இந்திராணியை தேவிதானே காப்பாற்றுகிறாள்? ஆனால் ஏன் இந்திரனுக்கு அடிக்கடி துன்பம் ஏற்படுகிறது? இதனால் எனக்கு பக்தி, இறையாண்மையின் மீது சந்தேகம் தோன்றுகிறது” என்றான் ஜனமேஜயன்.
சிறிது நேரம் கண்களை மூடி தியானித்த வியாசர் பேசத்தொடங்கினார். “கர்மங்கள் என்பது 'சஞ்சிதம்', 'பிராரப்தம்', 'வர்த்தமானம்' என்று மூன்று பிரிவுகளை உடையது. பிறவிகளில் தொடர்ந்து வரும் பாப-புண்ணியம் சஞ்சிதகர்மா எனப்படும். தற்பொழுது எடுத்திருக்கும் பிறவியில் ஒருவர் செய்யும் பாப-புண்ணிய கர்மங்கள் வர்த்தமானம் என்று அழைக்கப்படுகிறது. பிராரப்த கர்மா என்பது அடுத்து எடுக்க உள்ள பிறவியில் அனுபவிக்க வேண்டிய கர்மாவாகும். தேவர்கள், அசுரர்கள், மனிதர்கள் யாராலும் இதிலிருந்து தப்ப இயலாது. பிறவி மற்றும் உடல் என்பதற்கு கர்மாதான் காரணம்” என்றார்.
“வியாசரே! நான் மனிதப் பிறவி எடுத்துள்ளேன். என் கர்ம வினைகளால் பாப-புண்ணியத்தைச் செய்கிறேன். மற்றும் அதன் பயனை அனுபவிக்கிறேன். ஆனால் தேவர்கள், அசுரர்கள் கூட என் போன்றே அனுபவிப்பார்கள் என்பதை என்னால் நம்ப இயலவில்லை” என்றான் ஜனமேஜயன்.
“அரசனே, தருமனுக்குப் பிறந்த நர, நாராயணன் என்பவர்கள் தான் கிருஷ்ண, அர்ஜுனனாகப் பிறந்தனர் என்பதை நீ அறிவாய். அவர்களுக்கும் பிறப்பு, இறப்பு என்பது உண்டு என்பதை நீ அறிய வேண்டும். கிருஷ்ணர் சிறையில் பிறந்து, தாய் தந்தை விட்டுப் பிரிந்து நந்தகோபரிடம் வளரும் சூழ்நிலை. பதினோராண்டுகளுக்குப் பிறகு மதுராவிற்கு வந்து கம்சனைக் கொன்றார். உக்கிரசேனனை அரசனாக்கி, துவாரகைக்கு வந்து, பல பெரும் கர்மவினைகளைத் தன் கர்ம வசத்தால் செய்தார். பிறகு பிரபாசம் என்னும் இடத்தில் தன் உயிரை நீத்தார். கர்ம வினைகளால் கிருஷ்ணரின் குடும்பத்தைச் சார்ந்த அனைவரும், ப்ராஹ்மண சாபம் பெற்று, அதன் காரணத்தால் ஏற்பட்ட கர்ம வினையால் பிரபாசத்தில் நாசமடைந்தனர். அதேசமயம் தேவாம்சம் பொருந்திய பாண்டவர்கள் காட்டில் பிறந்தனர். பிறகு நகரத்திற்குச் சென்று தங்களுடைய வீரத்தால் பல வெற்றிகளைப் பெற்று ராஜசூய யாகம் செய்தனர். பிறகு பல்வேறு துன்பங்கள், கொடுமைகள் அவர்களைச் சூழ்ந்தன, நாடிழந்து, வீடிழந்து, காடுகளிலும், மலைகளிலும் திரிந்தனர். வனவாசத்திலும் அர்ஜுனன் பல பெருந்தவங்களை செய்தான். ஆனால் புத்திர சோகக் கொடுமையை அனுபவித்தவன் அர்ஜுனன். பூர்வஜன்மத்தில் நரனாகப் பிறந்தவன், மறு ஜன்மத்தில் அர்ஜுனனாக பிறவி எடுத்தான். அச்சமயம் அவன் செய்த தவங்களையும் மீறி அவனை கர்ம வினைகள் ஏன் சூழ்ந்தன? செய்த தவங்கள் ஏன் அவன் மகன் அபிமன்யுவைக் காப்பாற்றவில்லை? இதற்கான விடைதான் 'கர்மா' என்பதாகும். ஜீவன்கள் பிறப்பு-இறப்பு-மீண்டும்-பிறப்பு எனும் சூழலில் சிக்கும் பொழுது அதில் கர்மத்தின் கதி மறைந்துள்ளது என்பதைப் புரிந்து கொள்வதில்லை. தேவாம்சம் நிறைந்தவன் இவ்வுலகில் பிறக்கும்போது தேவாம்சமுடையவனாகப் பிறந்து, அதிக சம்பத்து, அன்னதானம் முதலிய கர்மாக்களைச் செய்கின்றனர். ரிஷியம்சம் கொண்டவர்கள் பூமியில் காவியங்கள் இயற்றுகின்றனர். ருத்ர அம்சம் கொண்டவர்கள் சிவனை பூஜிப்பவர்களாகப் பிறக்கின்றனர். இது போன்றே இந்திர அம்சம், அக்னியம்சம், யமஅம்சம், குபேர அம்சம் உடையவர்கள் தலைமைப்பண்பு, புகழ், வல்லமை படைத்தவர்களாகப் பிறப்பார்கள். ஆதலால் அரசே! படைக்கப்படும் உயிர்களுக்குத் தன் நினைவு இருப்பதில்லை. ஆனால் தேவியை சதா துதித்து இறையம்சம் பெற்றவர்கள் ஜனை-மரணம், சுக-துக்கங்களை அனுபவித்து மீண்டுவருகிறார்கள்” என்று வியாச முனிவர் ஜனமேஜயனுக்கு மட்டுமல்லாமல், நமக்கும் கர்ம பாதையைப் பற்றிக் கூறியுள்ளார்.