ருதம்பராஞானஸபாவின் வெள்ளிவிழா ஆண்டு நிறைவுதின நினைவுகள் - 08-02-2014

by arutsakthi Sat Feb 08, 2014 11:39 am

ஸ்ரீகுருப்யோ நம:
ருதம்பரா ஞான ஸபா, புதுடில்லி
ருதம்பராஞானஸபாவின் வெள்ளிவிழா ஆண்டு
நிறைவுதின நினைவுகள்
விஜயஆண்டு தை மாதம் 26ம் தேதி (08-02-2014) வெள்ளிக்கிழமை

அன்புடையீர்!

காலம் என்பது ஒருபரிமாணம். அதனால்தான் நாம் நமது வயது மற்றும் உலக நடைமுறை என்பதை தெரிந்து கொள்கிறோம். ஆனால் காலத்தை நிறுத்திவைக்க முடிவதில்லை. அது உலகஆக்கல் என்று தொடங்கியதோ அன்று தொட்டு கணக்காகிவிடுகிறது. நாம் நமது கணக்கில் மாதம், வருடம் என்று கணக்கிட்டுவருகிறோம். இந்த சிந்தனை நமக்கு ஏன் இப்போது வந்தது என்று பார்த்தோமானால் நமது ஸபா தொடங்கினது நினைவுக்கு வந்ததால்தான்.

அருட்சக்தியின் மனத்தகத்தில் தோன்றிய இந்த ருதம்பராஞானஸபா என்ற அமைப்பு தொடங்கினதாகக் கொண்டநாள் 1989ம் ஆண்டு ஜனவரி மாதம்17ம் தேதி அதாவது சுக்ல ஆண்டு தை மாதம் 4ம் தேதி மங்களவாரம் கிருத்திகை நÑத்திரம் கூடிய நன்னாள். அன்றேதான் நமது குருநாதர் பரமபூஜ்ய ஸ்ரீஅநந்தாநந்தநாதர் அவர்களின் ஜன்ம நக்ஷத்திரம். அது மட்டுமா குஹானந்தமண்டலி என்ற அமைப்பின் பெயருக்குக்காரணமான பரமபூஜ்ய ஸ்ரீகுஹாநந்தநாதர் அவர்களின் ஜன்ம நக்ஷத்திரமும் ஆகும். இவ்வாறான ஒரு ஸுதினத்தில்தான் அவர்களின் கருணையால் இந்த எண்ணம் தோன்றியது.

உலகில் எங்கெங்கெல்லாம் ஆத்மஞானத்தேடலுடன் மக்கள் இருக்கிறார்களோ, வேதாந்த ஞானத்துடன் வாழ்கிறார்களோ அவர்களெல்லாம் இந்த ருதம்பராஞானஸபாவின் அங்கத்தினர்கள் ஆவார்கள் என்று அடியேன் மனத்தகத்தில் உறுதிகொண்டேன். அவர்கள் மாதமொருமுறையோ இருமுறையோ தாங்கள் ஒன்றுகூடி பகவன்நாமாவையோ, மந்த்ர ஜபத்தையோ, பூஜை, ஜபம், த்யானம் என்று செய்வதையோ இந்த ஸபாவிற்கு அவர்கள் செலுத்தும் சந்தாவாகக் என்னளவில் கருதிக்கொண்டேன். அவர்கள் பெயர்கள் விவரங்கள் எதுவும் தெரிந்துகொள்ள வேண்டிய அவசியமில்லை. இதற்கு பொருளாதாரம் எதுவும் தேவையில்லை. நிதியாதாரமும் ஏற்படுத்திக் கொண்டதில்லை. நமது நடப்புக்கள் தான் இறைவனுக்கோ இறைவிக்கோ தெரியுமே! 'லோகாஸ்ஸமஸ்தாஸ்ஸுகீனோபவந்து' என்பதுதான் வேதமாயிற்றே! அது போதும்.

இவ்வாறு தோன்றின இந்த அமைப்பு திருவருளால் இன்றைக்கு 25 ஆண்டுகள் நிறைவேறி யுள்ளன. அதனால் அதன் வளர்ச்சியை திரும்பிப்பார்க்கிறோம்.

தொடக்கத்தில் பிரதி சனிக்கிழமை மற்றும் ஞாயிற்றுக்கிழமைகளில் மாலைவேளையில் 4 மணிமுதல் 7 மணிவரையில் குருதத்வவிமர்சம் என்ற ஸ்ரீஸார் ஸ்ரீசிதானந்தநாதர் அவர்களின் நூல் தொடங்கி ஸ்வாத்யாயம் என்ற நிலையில் படிப்பது விளக்கம் சொல்வது என்றவாறு ஸத்ஸங்கம் நடத்தினோம். நடத்தினோம் என்றால் எத்தனை நபர்கள் என்ற விநா வருகிறதல்லவா! என்னையும் சேர்த்து 4 நபர்கள்தான். வீடோ இரண்டே அறை கொண்டது சமையல் அறையும் சேர்த்து. இந்த நாட்களில் கணினி ஆரம்ப கால Dos Mode பயன்பாட்டில் இருந்ததால் இதிலேயே ஸ்ரீவித்யாபூஜை,பாராயணங்களுக்கான தேவிமானகணனம் என்கிற அஷ்டாங்கத்தை சிவி.நாகசுந்தரம் செய்து நாங்களும் உபயோகி த்ததுடன் சென்னைவாழ் சில உபாஸகர்களுக்கும் அச்சிட்டு மாதகாலண்டராக விநியோகித்தோம். இவ்வாறு தொடங்கின இந்த ஸத்ஸங்கம் 1993 ம் ஆண்டுமுதல் புதுடில்லி வாஸம் ஏற்பட்டதால் அது சென்னை மாறி புதுடில்லியானது. இங்கும் உபாஸக நண்பர்கள் இருந்தார்கள். இதன் மத்தியில் ஸத்குருவின் கருணை இங்கும் ஸபா அங்கத்தினர்கள் ஏற்பட்டு வாராவாரம் ஸத்ஸங்கம் தொடர்ந்தது. இடையில் 'வைகரி' என்ற கையெழுத்து மாதசஞ்சிகை ஒன்றும் ஸ்ரீவித்யா சம்பந்தமான கட்டுரைகளுடன் சில பிரதிகள் அச்சிட்டு விநியயோகித்தோம். சில அங்கத்தினர்களின் உறவினர்கள் என சென்னையில் எற்பட்ட விரிவு மேலும் எண்ணிக்கை கூடியது. இதனால் எனக்கு சென்னை பயணம் அடிக்கடி ஏற்பட்டு வருடாந்திர பூஜை எனவும்,ஜபஹோமங்கள் எனவும், லக்ஷார்ச்சனை எனவும், ஸ்ரீவித்யா பட்டறை எனவும் தொடர்ந்து நடக்க ஏற்பட்ட வாய்ப்பானது அரிய பெரிய செயல்கள் அநாயாஸமாக நடைபெற ஸத்குருவருள் கூட்டிற்று. குறிப்பாக அருட்சக்தி எழுதிய 'ஸ்ரீகுருப்ரகாசமலர்' என்ற ஸ்ரீகுருஜி அவர்களின் வரலாறு,சிதானந்தஅலை என்ற நவாவரணபூஜையின் தத்துவவிளக்கம், ஸ்ரீதிதி நித்யாயந்த்ர படங்கள் பூஜையுடன், ஸ்ரீவித்யாஉபாஸகதர்மங்கள் என பல வெளியீடுகள் ஸபா சார்பில் வெளியிடப்பட்டன.

மேலும் ஸபா அங்கத்தினர்களின் மிகுந்த ஒத்தாசை, பிரயாசையுடன் நடைபெற்ற சில குறிப்பிட்ட நிகழச்சிகள்:

1. உலகில் உள்ள உபாஸகப்பெரியோர்கள், அங்கத்தினர்கள் அனைவரும் கூடி 10 கோடி ஸ்ரீபாலாமஹாமந்த்ர ஜபம் செய்து, அதில் பெரும்பாலானவர்களை சென்னையில் மடிப்பாக்கத்தில் 2007ல் கூட்டி, ஹோமம் செய்ய வைத்ததுடன் 51 பிரயத்யக்ஷகுமாரிகள் பூஜையும் விமரிசையாக இருதினங்கள் செய்தது.
2. கும்பகோணத்தில் 2008ல் ஸ்ரீலலிதாம்பிகா மங்களம் என்ற நாட்டிய நாடகத்தை அறங்கேற்றியது.
3. ஸ்ரீகுருஜி அவர்களின் மனத்தகத்தில் இருந்த ஸ்ரீலலிதாம்பிகா லக்ஷார்ச்சனையை விதிமுறை வழுவாமல் கும்பகோணத்தில் 2011 ல் பல ஸ்ரீவித்யாமண்டலித்தலைவர்கள் மற்றும் உபாஸகர்கள் உதவியுடன் மிக விமரிசை யாக இருதினங்கள் நடத்தியது.

இதனால் எங்கள் ஸாதனைகள் மேம்பட்டன. உபாஸகநண்பர்கள், மண்டலித்தலைவர்கள் என இந்த வட்டம் பெறுகிற்று. இதற்கெல்லாம் இன்றைய வலைத்தளங்களும், இணையதளங்களும், மின்னஞ்சலும், தொலைபேசிகளும் கைபேசிகளும் மிகுதியும் பயன்பட்டன. பயன்பட்டு வருகின்றன. முன்னேறிய கணினி பயன்பாட்டால் ஸ்ரீவித்யாபூஜை, பாராயணங்களுக்கான தேவிமானகணனம் என்கிற அஷ்டாங்கம் ஸங்கல்பத்துடன் இன்று வலைத்தளங்களிலும், இணையதளங்களிலும் எளிமையாக அன்றன்று கைபேசியிலேயே பார்த்துக் கொள்ளும்படியாக எளிமையாக கிடைக்கின்றன. மிக அபூர்வமான, விசேஷமான ஸ்ரீவித்யாபாராயணங்கள், தினசரி செய்யவேண்டிய பாராயணங்கள் என ஆன்லைனிலேயே இப்போது செய்யலாம். நமது எண்ணங்கள், யோசனைகள், கட்டுரைகள், ஆன்மீகக்குறிப்புகள், ஆன்றோர் அறிவுறைகள் என அத்தனையையும் பகிர்ந்துகொள்ளலாம். பதிலும் கொடுக்கலாம். இதற்கு உலக மொழிகள் எதுவும் தடையில்லை.

இவ்வளவும் நமது ருதம்பராஞானஸபாவின் பெரிய ஸாதனைகள் என்றால் மிகையில்லை. ஆனால் எந்த வேலைக்கும் ஒருவரின் முயற்சியும் உழைப்பும் தேவையல்லவா! அதற்கு எனது குமாரன் திரு.நாகசுந்தரம் தன் பணியினையும், நேரத்தையும் மிகவும் இதற்காக செலவிட்டிருக்கிறான். ஸபாவிற்கென தனி இணையதளம் 'வைகரி' ( vaikari.net ) என்ற பெயரிலும், இணையமன்றம் (Forum) எனவும் தயாரிக்கப்பட்டு உபயோகத்தில உள்ளன. தேவிமானகணணம் என்கிற அஷ்டாங்கத்;துக்கு தனி மென்பொருள் (Software) கண்டதும் அவனே. மேலும் கைபேசியிலேயே இப்போது காணலாம். மேலும் அங்கத்தினர் திரு மு. கிருஷ்ணமூர்த்திஅய்யர் கவிதைகள் பதிவுக்கென தனிமன்றமும்(Forum), திரு நாகசுந்தரத்தின் 'அருள்தரும் ஆயிரம் தமிழிசைபாடல்கள்' என்ற ஸ்ரீலலிதா ஸஹஸ்ரநாமங்கள் பதிவுக்கென தனிமன்றமும்(Forum) அதிலேயே உள்ளன. அங்கத்தினர்களும் பெரும்பாலும் நமது தளத்தின் மூலம் அடிக்கடி தொடர்பு கொண்டு பயன்படுத்தி வருகிறார்கள். பயன் பெறுகிறார்கள். மற்ற வெளியார்களும் பயன் பெறுகின்றனர்.
அனைவரும் தினசரி ஒருமுறை இணையதளம் 'வைகரி' ( vaikari.net ) சென்று பாருங்கள்.
இந்த வெள்ளிவிழா ஆண்டில் 31-01-2014 அன்று தொடங்கிய ஸ்ரீசியாமளா நவராத்திரியை முன்னிட்டும், வெள்ளிவிழாவை முன்னிட்டும் சென்னை திருமதி வி.சாவித்திரி தன் வீட்டில் மிக சுருக்கமாகவும், ஆத்மார்த்தமாகவும் ஸ்ரீலலிதாம்பிகைக்கு லக்ஷார்ச்சனை செய்துள்ளாள். அதன் பூர்த்திதினம் சரியாக 08-02-2014 இருபத்தைந்து (வெள்ளிவிழாஆண்டு) நிறைவாக அமைகிறது. எல்லாம் ஸத்குரு கருணையால் விளைந்த திருவருள் ஆசிகள்.

இவ்வாறாக நமது ருதம்பரா ஞானஸபாவின் 25 ஆண்டு கால வளர்ச்சியினை இங்கு சற்று நினைவு படுத்திக்கொண்டோம். இது இன்னும் மேன்மேலும் வளர்ந்து ஸ்ரீவித்யா உபாஸகர்களுக்கும், மற்ற ஏனையோர்க்கும் பயன்பட்டு ஆத்மஞானதேடல் விரிவடைந்து நமது ஸத்குருநாத மண்டலியின் புகழ் பரவவேணுமாய் எல்லாம்வல்ல பராசக்தியை வேண்டுவோம்.
சாதனையும் பக்தியும் தான் ஒருவனை ஆத்ம ஞானம் அடைய வைக்கும்.. சிந்தியுங்கள் ! உபாசக தர்மத்தை கடைப்பிடியுங்கள் ! தான் தான் என்ற கர்வத்தை விடுங்கள்1 அனைவரிடமும் அன்பாய் இருங்கள். எதையும் கொண்டு வரவில்லை. எதையும் கொண்டுபோக போவதில்லை. குரு வழி அருள் வழி!
ஆசிகள்.
உங்கள் சொந்த ஆத்மன்.
அருட்சக்தி நாகராஜன்
08-02-2014