ஸ்ரீகாமேச்வரியின் 67 ஆவது ஜயந்தியும் – ஸ்ரீசக்ரநவாவரணபூஜையும்

ஸ்ரீகாமேச்வரியின் 67 ஆவது ஜயந்தியும் – ஸ்ரீசக்ரநவாவரணபூஜையும்

சென்னை - மடிப்பாக்கத்தில் 22-02-2015 ஞாயிறு அன்று நடைபெற்ற வைபவத்தின் விவரம்.

சென்னை - மடிப்பாக்கத்தில் இருக்கும் நமது ஸபா அங்கத்தினரான ஸ்ரீமதி சாவித்திரி தான் வீடுவாங்கி குடிவந்ததிலிருந்து தனது வீட்டில் பூஜையும் அனைவருக்கும் விருந்தும் செய்யவேணுமென அடிக்கடி சொல்லி வந்தாள். அதற்கான சமயத்தை அன்னை இப்போதுதான் ஏற்படுத்திக்கொடுத்தாள் என்று கொள்ளலாம்.

அவள் குறிப்பிட்டவாறு தன் குருபத்னியும் எனது சக்தியுமான ஸ்ரீமதி புவனேச்வரியின் 67 ஆவது பிறந்தநாளான மாசி பரணி நக்ஷ்த்திரத்தில் செய்யலாம் என நினைத்தோம். ஆனால் அன்று புதன்கிழமையானதால் நமது அங்கத்தினர்களின் லெளகீக அசெளகரியத்தை கருத்தில் கொண்டு இருநாட்கள் முன்னதாக 22-02-2015 ஞாயிறு அன்று நடத்தலாம் என எண்ணி தொடங்கப்பட்டது. இதன் மத்தியில் எனது மனதில் வெகுநாட்களாக சிந்தித்திருந்த நவாவரணபூஜையின் விளக்கவுரையையும் இதில் இணைக்கலாம் என்று நினைத்தேன். ஆனால் அதற்கு ஒரு பெரிய ஸ்ரீசக்ரம் அதில் உள்ள தேவிகளின் பெயர்களுடன் தேவைப்பட்டது. உடன் நானும் எனது குமாரனும் அதனை கணினியில் வரைய முற்பட்டு பல முறை முயன்று முயன்று ஒருவாறாக ஒரு ஸ்ரீயந்த்ரம் உருவானது. அதனை அச்சிடவேணுமே! கணினி கூகுள் உதவியுடன் சென்னையில் ஒரு பிரிண்டரின் விலாசம் கிடைத்தது. அங்கு மெயிலில் படம் அனுப்பினால் அது பெரிய அளவில் இருந்ததால் போகவில்லை. மறுபடியும் வேறு விதத்தில் வரைந்து அனுப்பினோம். அவரும் அச்சிட்டுத்தருதாக சொன்னதில் முதல் வேலை முடிவுக்கு வந்தது. இதன் இடையிலேயே அடுத்ததாக ஸ்ரீசக்ர தேவிகளின் உருவங்கள் தேவைக்கான தேடல்கள் நடைபெற்று வந்தன. அந்தந்த ஆவரணங்களின் இடத்தில் விக்ரகங்களை வைத்து விளக்கம் செய்யலாம் என்ற நிலையில் கும்பகோணம், ஸ்வாமிமலை ஆகிய இடங்களில் சிறிய விக்ரகங்களாக கிடைக்கவில்லை. கிடைத்ததும் முகம் அமைப்பு சரியில்லை. எனவே விக்ரகங்களுக்கு பதில் மஞ்சள் கிழங்கையே வைத்து பூஜிக்கலாம் என்று அருளாணை கிடைத்தது. இந்நிலையில் பூஜையை ஸ்ரீமதி சாவித்திரியின் வீட்டில் எங்கு செய்யலாம் என்று யோஜித்து முடிவெடுக்க அவளே இங்கு டில்லியில் ஸ்ரீகாமேச்வரியின் ஆராதனை-பூஜையில் பங்கெடுக்க வழக்கம்போல் இங்கு இருந்ததால் சுலபமாயிற்று. கீழே கார் ஷெட்டில் மிக அழகாக நடத்தலாம் என்ற நிலையில் ஏற்பாடுகள் செய்தோம்,
கும்பகோணத்தில் மஞ்சள்கிழங்கு வாங்கப்பட்டது. திருவல்லிக்கேணியில் மிக அழகாக தயாரிக்கப்பட்ட ஸ்ரீசக்ரம் (36"x36") வந்துவிட்டது. மற்ற சாமான்களும் தயாரானது. புஷ்பங்களோ வந்து குவிந்துவிட்டன. ஸ்ரீகுருநாதர் எதிரில் நேரில் அமர்ந்திருப்பதுபோல் அவர்களது உருவம் தயாராகி அமர்ந்ததும் அற்புதம்தான். இதன் மத்தியில் நமது அன்புக்கு பாத்திரமான நண்பர் ஸதுபாஸகப்ரியதமா: ஸ்ரீரமேஷ் தம்பதியும் இதில் கலந்துகொள்ள விரும்பி உடனிருந்து மட்டுமில்லை. தக்கவாறு அபூர்வமான விளக்கங்களை தனக்கே உரிய விதத்தில் சொன்னது பலருக்கு நல் வெளிச்சம். பின் பூஜை நடைபெற்றவிதம் நீங்கள் யாவரும் அறிந்ததே! பூஜைக்கான இடமும், வசதிகளும், மனுஷ்யாள் உதவிகளும், நினைத்தவாறு (நினைவே குருவினது) நினைத்தபடி மிக சிறப்பாக நடந்தது அருளின் ஆற்றல்தான். இன்னவாறு இன்னபடி இன்னாரால் இதுநடக்கும் என்பது சக்தியின் நியமனமாயிற்றே! அதுதான் நடந்தது. இதில் நாம் மார்தட்டிக்கொள்ள ஒன்றுமேயில்லை என்பதுதான் உண்மை.

முன்னுரையுடன் யாகமந்திரப்ரவேசம் தொடங்கி சதுராயதனம் வரையும், லயாங்கம், ஷடங்கம், திதிநித்யா, குருமண்டலம் வரையும், முதலாவரணம் விளக்கமும், பின் இரண்டாவது ஆவரணம் தொட்டு முடிவு வரையும் விளக்கங்கள் அருளாலும், ஸ்ரீரமேஷ் அவர்களாலும் கிடைத்ததை அனைவரும் அனுபவித்தோம். விளக்கவுரைகள் தனியாக பெரிய ஸ்ரீசக்ரத்தில் நடைபெற்றதால் முக்கிய பூஜை பெரும்பாகமும் ஸ்ரீசாவித்திரி செய்தது பாராட்டுக்குரியது. பூஜை தெரிந்த, படிக்கத்தெரிந்த மற்றவர்களும் அதற்கு தக்கபடி உதவினார்கள். ஸ்ரீமதி அம்பிகாமாமியை ஸ்வாசினியாக வரித்து பூஜித்தோம். வழக்கம்போல் குருபூஜையும் நடந்தது.

இதனால் யார் யார் பயனடைந்தார், என்ன என்ன கிடைத்தது என்றெல்லாம் வரவு செலவு கணக்கு பார்க்க வேண்டியதில்லை. அது அவரவர் மனதிற்கு புரிபடவேண்டியது. நேரமும் பணமும் நமக்கு விரயமானாலும் ஒரு தன்மயமான ஆனந்தவுணர்வு என்னை பொருத்தவரையில் மிகுந்துள்ளது. இதுபோல் அவரவரும் தன்னளவில் இதனை உணர்ந்திருப்பாரானால் அதுவே இதன் பயன்.

ஆத்மலாபமன்ன பரம் ந வித்யதே ..... என்றவாறு நமக்கு ஜபமோ பூஜையோ சாதனையோ தபஸோ அல்லது குடும்ப வேலைகளோ எதுவானாலும் அது ஆத்மலாபமான சிவசக்தியில் இணைவதே! எல்லாவிதமான முயற்சிக ளையும் எடுத்துக்கொண்டு பரதேவதையை ஆராதனம் செய்வதன் மூலமாக பூர்ணஞானரூபமான ப்ரஹ்மபாவத்தை இச்சிப்போம். நிர்குணமான ப்ரஹ்மத்தை அபரோக்ஷமாக அடைவோம். தன் உண்மையான ஸ்வரூப லாபத்தை அடைவதைத்தவிர நமக்கு மற்றோன்றில்லை

எனவே இதனை அனுஸந்தானம் செய்தவாறே அமைவோம்.
Arutsakthi Nagarajan,
http://vaikari.net

ஓம் ஸ்ரீ குருப்யோனமஹா ஓம் சக்தி
அனேக நமஸ்காரங்கள்
ஸ்ரீ சக்ர நவாவர்ண பூஜை நடந்த விதம் பற்றிய விளக்கங்களும் படங்களும் பார்த்தோம். மனதுக்கு ரொம்பவும் இதமாக இருந்தது. அதில் கலந்து கொள்ளும் வாய்ப்பும், அதை அனுபவித்து மகிழும் பாக்கியமும் எங்களுக்கு கிடைக்கவில்லை. ஆனால் படங்களும் விளக்கங்களும் ஓரளவு திருப்தி செய்தது.
ஸ்ரீ குருஜி அவர்களும், திரு ரமேஷ் அவர்களும் அளித்த
விளக்கவுரை கேட்கமுடியவில்லையே என்ற ஆதங்கம்தான்.

மிக்க நன்றி

வெங்கட்ராமன், கல்யாணி
மார்ச் 9 2015

ஓம் ஸ்ரீ குருப்யோனமஹா

"குருவின் மகிழ்ச்சியே சீடனின் எழுச்சி "

நமது குருஜி அவர்கள் சொன்ன மேற்கண்ட வாக்கியம் மனதிற்கு நினைவிற்கு வருகிறது இப்பொழுது நடந்துள்ள " ஸ்ரீசக்ர நவாவர்ண பூஜை".
ஏனென்றால் நடந்த இடம் திருமதி சாவித்திரி அவர்கள் வீடு. ஸ்ரீ குருவின் திருவருளால் இருந்தால் தான் இப்படிப்பட்ட காரியம் சாத்தியமாகும்.
திருமதி சாவித்திரி அவர்களே,
எங்கள் மனதுக்கு மிகவும் சந்தோஷமாக இருக்கிறது.
நன்றி

கல்யாணி, வெங்கட்ராமன்